Елена:Ниту еден обид за бојкот нема да ме спречи да продолжам со промоцијата на македонската песна!

Елена Велевска важи за револуционер во македонската фолк музика, со тоа што уште од самите свои почетоци пред 21 година започна да се издвојува и да го привлекува вниманието на публиката, секогаш претставувајќи спотови, песни и фотосесии поинакви од претходно видените.

Во моментов е актуелна со две нови песни „Погледни ме за край“ и „Ще си моя“ (дует со Борис Дали), кои полека ја освојуваат публиката, за што говорат и прегледите во официјалниот канал на телевизија „Планета“ во YouTube – PlanetaOfficial.

Велевска откако ја објави својата десета турнеја во Австралија која стартува овој месец во емисијата „Ѕвездно“ по Планета Тв, поради една мало недоразбирање се најде во центарот на вниманието кај македонската публика.

„Музиката е посебен свет, империја која опстојала колку и човештвото на оваа планета! Оставете ја музиката надвор од политиката и лепењето етикети. Музиката е безвременска, не познава религија, нација, јазици, а посебно не негативци. Јас сум Македонка, пеам на Македонски јазик, говорам Македонски јазик. Но, пеам и на многу други јазици и ќе продолжам со тоа, учејќи и нови јазици, никаква местенка нема да ме спречи во тоа.Секое мое телевизиско гостување надвор од Македонија го користам за промовирање на Македонскиот јазик. Секогаш пеам песни создадени од наши домашни автори. Секое мое телевизиско гостување говорам на Македонски јазик, за разлика од многу “патриоти”. Кога тие одат надвор или им пишува ФИРОМ или на интервјуа се трудат да зборуваат друг јазик, а не својот Македонскиот.Три години ми требаше да ја прифатам понудата од Пајнер (Payner). Кога решив дека ќе го направам тоа го направив со Македонска песна од Македонски автори и видео спот сработен со македонска продукција.Како некој што повеќе од 20 години е на естрадата, можам да кажам дека сум еден од најголемите негувачи на Македонската музика. Отсекогаш сум ја негувала Македонската песна, испеав и новокомопонирани и стари Македонски песни. Моите хитови се слушаат насекаде и горда сум што ја презентирам Македонската музика низ светот.Извадок од контекст од мојата изјава малку предизвика непотребен револт бидејќи се работи за недоразбирање. Сакав да кажам дека се слуша и Бугарска музика. Дел од различните националности во дијаспората кои потекнуваат од различни комшиски држави доаѓаат на мои концерти. Така како што македонски граѓани одат на концерти на други странски пејачи. Ако го изгледате целото видео ќе видите што кажувам до крај на видеото! Не е чесно да извадите од контекст само една реченица и да направите кампања со тоа. Прикажете или коментирајте го заклучокот од целото видео или пак целото мое минато за македонската музика. Македонските песни кои ги набројав се “Облаче ле бело” и “Јовано јованке” бидејќи тоа се наши песни. Тие се многу популарни во сите Балкански земји, па и во Бугарија и насекаде во дијаспората, а се подготвуаме за турнеја во Австралија. Нема некој кој потекнува од овој крај на Европа, а да не ја знае “Јовано Јованке”. Или да не знае дека е македонска песна, за што и не сметав дека посебно треба да нагласам.Жал ми е што некои од Радио Илинден – Австралија тоа го искористија за погрешно да ја пренесат мојата изјава токму пред турнејата во Австралија. Но ете ако од целото интервју не разбрале ќе повторам. Македонските песни се “Облаче ле бело” и “Јовано јованке”, но ги слушаат и ги препеале и Бугари и Срби и Хрвати и Босанци и Црногорци насекаде по светот. Тоа ме радува, бидејки тие наши македонски песни живеат насекаде. Јас и понатаму ќе продолжам да ја преставувам Македонската музика најдобро што можам. Македонската песна преку 20 години ја негувам, нема да ме спречи ниту една местенка!“ – изјави Елена ексклузивно за нас.

Покрај сето тоа, таа одлучи да ги израдува фановите и со чисто нова фотосесија, дело на Кики Муки, во која го истакна својот сексапил, покажувајќи уште еднаш дека е во топ форма, и покрај тоа што е мајка на три деца.

Автор - Наташа Секуловска